Сіз өміріңізде бір рет болса да қан тапсырып көрсеңіз, кемінде үш адамның өмірін құтқардым деп есептей беріңіз. Мамырдың он сегізін "Маңғыстаумұнайгаз" АҚ қызметкерлері қан орталығының арнайы көшпелі бригадасының мамандарымен бірге өткізді. Акцияның негізгі идеясы – өз еркімен қан тапсырып, донор болатын адамдардың қатарын көбейту. Екі күнге созылған аталмыш акцияға 56 адам қатысты.

- Жалпы, мұнайшылардың ерікті түрде қан тапсыру акцияларына қатысуы бірінші рет емес, - деді емдеу-алдын-алу мекемесінің терапевт дәрігері Е. Жалғасбаева. Әрбір төрт ай сайын қан тапсыруды жақсы үрдіске айналдырған сіздің компанияңыздың қызметкерлеріне үлкен алғыс білдіреміз. Донор болатын адамның денсаулығы дұрыс болу керек. Олардың барлығы қан тапсырар алдында дәрігерлік және зертханалық тексеруден өткізіледі. Негізі, қан тапсырудың донор үшін ешқандай зиянды салдары жоқ. Керісінше, қанның белсенді жаңаруына, жүрек қан тамыры жүйесі мен ішкі органдар жұмысының жақсаруына әсер етеді..

Қан тапсырушы өндірістік департамент бас механик бөлімінің аға инженер-механигі А. Бинияз әріптесіміз «Мен өзім азаматтық белсенділігімді танытып донорлықтың аса қажетті екендігін көпшілікке білдіргім келді. Осы акция арқылы адамдардың өміріне араша болатынымыз сөзсіз. Көмекке мұқтаж болып жатқан сырқат адамға жөпелдемеде дем бергенге не жетсін», - десе, кезекте тұрған әкімшілік мәселелер департаментінің іс жүргізушісі Л. Ким «Егер дәрігерлік тексеріс лайық деп тапса, қан тапсырып, зәру жандарға көмегімді беруге дайынмын. Болашақта тұрақты түрде қан тапсырып тұруға болады» деген ойын жеткізді.

Осындай ізгі жандардың арқасында күн сайын соншама қанның алмасып, жарық дүниеден қара үзіп қала жаздаған сонша жүрек атқақтап қайта соғатыны даусыз. Өзгеге өмір сыйлауды сауап деп білсеңіз, осындай қайырымды шаралардан сіз де қалыс қалмауға тырысыңыз.

А.Ақшаева