Ұлы жеңіс – халықтың батырлығы. Уақытқа әмірің жүрсе, қане! Біз ес білгендегі қарағайдай қайыс ардагерлердің қатары сиреді бүгінде. Сондықтан барын базарлау – елге де, ерге де сын!

...Маңғыстау топырағындағы соғыстан жары мен баласы оралмаған барлық аналардың рухына арнап Оңды жерінде Ай-Ана ескерткіші орнатылып, ой мен қырдан жиылған ен жұрт, қазақ зиялылары бас қосқан жиында марқұм Серікбол Қондыбайдың анасы Тәрбие апамыз Әбіш аға Кекілбаевқа, «Әбіш-ау, бір ескерткішті ана Қаражалдың басына орнатсаңдаршы, сол жалдан асқан азаматтардың оралғаны аз, жалаңаяқ бала жаяу жүгіріп жете алмайтынбыз параходқа тиеуге алып бара жатқан әке-ағаларымыздың артынан. Жылай-жылай өкпеміз өшіп, Қаражалдың басында балалығымызды көмдік» деп, сол кездегі облыс әкімі Қырымбек Елеуұлына сағыныштан сартап болған бұйымтайын айтқан еді. Өзі кәріліктің желкесіне мінген Ананың көзі сонда жасқа толып тұрды...

...  Қаражалды қара бұлт торлағанды,

Қара қоспақ аңырап боздағанды

Отағасы кеткенде от кешуге

Шешем салған, шерлі бір қозғап әнді.

Ауылдың алды қаражал,

Қаражал бейне сұм ажал.

Сол жалдан кеткен боздақтың

Қайтпады елге бірі аман.

Мұнартып жатыр Қаражал

Зіл артып жатыр Қаражал.

Қайтпады ұлы қырғыннан,

Кемсеңдеп отыр қара шал... - деген жыр қалды ол жылдардың тақсірет-тарихынан.

Шүйінші, халқым, шүйінші!

Шүйіншіге сүйінші!

Шаттан, ата-анамыз,

Шаттан, ата-бабамыз,

Кек қайтарып фашистен,

Соғыс бітті жеңіспен,

Жеңдік жауды күресте

Жасалсын той-мереке! - деген қазақтың ақыны Тайыр Жароковтың өлеңін жаттап ержеткен, майданның тозағын көрген қара шалдардың қолына су құюға таласып өскен ұрпақ бүгін аға жасында. Бұл жырлар соғыс оты шарпыған тұтас әлемді айтпағанда, түбекте жатқан аз ел – Маңғыстаудың тақсіретті жылдарынан қалған ескерткіш...

...Мамырдың тоғызы келген сайын көзі тірі ардагерді көрсем, қуанамын. Олардағы рух, азаматтық парыз, батырлық... бүгіннің баласына мұнан артық не үлгі керек?!

Жеңіс туының көкте желбіреуіне сеп болып, намысын найзасына байлап, Отан үшін майдан дейтін маздаған отпен бетпе-бет келіп, өңірімізден зұлмат соғысқа аттанғандар аз емес. Солардың ерен ерліктерін паш етіп, құрмет көрсету – бейбіт өмірдің ұрпағына берілген аманат.

5 мамырда Жеңіс күні мен Отан қорғаушылар мерекесінің құрметіне "Маңғыстаумұнайгаз" акционерлік қоғамында салтанатты жиын өтті. Компания ғимаратының үлкен мәжіліс залында соғыс және тыл ардагерлерін, ауған соғысына қатысушыларды, Чернобыль апатын қалпына келтірушілерді ұжым болып қарсы алып, құрмет көрсетті.

Жиында "Маңғыстаумұнайгаз" АҚ Бас директоры Б.Иманбаев ардагерлерді бейбітшілік көктемі, ерлік көктемі, Жеңіс көктемімен құттықтады.

– Болашақ ұрпақтың бақытты ғұмыры үшін қан майданда қайсарлық көрсетіп, бүгінгі бейбітшілік заманды сыйға тартқан Өздеріңіздей ардагерлердің алдында мәңгі қарыздармыз. Сіздерге мықты денсаулық, шаңырақтарыңызға шаттық, елімізге тыныштық тілеймін, - деді "Маңғыстау-мұнайгаз" АҚ Бас директоры Б.Иманбаев. Кәсіподақ ұйымының төрағасы Талғат Айдынов пен қытайлық әріптестер атынан бас директордың орынбасары Чэнь Цюань да ізгі ниеттерін жеткізді. Мұнайшы өнерпаздар Айбек Жұрынбаев, Махинур Ерғали, Талғат Жақыпов, облысқа танымал әнші Аида Байгелова кеш салтанатына салтанат қосты.

Жиын аяқтала салысымен, Басқарма басшылары бастап, соғыс және тыл ардагерлерімен "Мәңгілік алау" монументіне гүл шоқтарын қойды, майдангерлер рухына тағзым етті.

Компания басқармасы ардагерлерге арнап "Гранд Виктория" мейрамханасында дастархан жайып, бейбіт өмірді сыйлаған жандарды төрге оздырып құрмет көрсетті. Мерекелік шарада ардагерлер отты жылдардың азабы мен ауыртпалығы жайында естеліктер айтты.

–   Жастық шағымыз майдан даласында өтті ғой. От пен оқтың ортасында күн кешкен сол сұрапыл жылдардың естелігі жадымыздан еш өшпейді. Ел үшін ұрыс даласында ерлікпен қаза тапқан ардагерлерді бүгінгі ұрпақ ұмытпаса екен дейміз, – деді Ұлы Отан соғысының ардагері Қамқа Үмбеталиқызы.

Нина Ивановна Токарева, Ирина Викторовна Каленкевич, Анна Петровна Козмодемьянская Маңғыстау түбегін игерген атақты азаматтардың түтінін түтетіп отырған, кезінде жарларымен қатар тұрып, қазыналы өлкенің дамуына үлес қосқан жандар. Әрқайсысының өмір тарихында, тағдырының баянында қанқұйлы соғыстың аяусыз қанды ізі жатыр. Соғыс жетім атандырған абзал аналардың жанарларынан жасы төгіліп тұрып шерткен сырына, қазақ халқына мәңгі қарыздар екендіктерін айтып толқыған тілектеріне залда жүрегі елжіремеген жан қалмады...

... 9 мамыр мерекесі ұрпақты сабақтастыратын күн. Сөзімнің дәлелі, мереке қарсаңында жас мамандар Кеңесінің жас мұнайшылары 18 ардагердің үйінде болып, ән-күйден мерекелік сәлем жолдап, заттай және қаржылай көмегін табыс етті.

– Әрине, аталған шаралардың ешбірі ардагер аталарымыздың бейбіт те бақытты өмірді сыйлаған ерлігінің, елге сіңірген еңбегінің есесін қайтара алмасы анық. Дегенмен, жас ұрпақ осындай игілікті істердің қатарын сиретпей, ардагерлерімізді тек мереке қарсаңында емес, жыл бойы назардан тыс қалдырмауымыз қажет деп есептеймін деді, – жас мамандар Кеңесінің "Жетібаймұнайгаз" ӨБ төрағасы Елтай Тұрбергенов.

Шүкірлік ететін жайт, ізге ерген ұрпақтың ата-бабадан мирас болған, қазаққа тән қамқорлық, бауырмалдық, мейірім мен қасиеттің "қанына тартпағанның - қары сынсын дейтін" бабалар сертінің өшпей, өркен жайғаны бұл деп топшыладық. Сынаптай сырғыған аласапыран заманның салқынынан қазақы тәрбиенің биік тұрғандығына қарап, осы елдің ертеңі жауапты ұл мен қыз үшін еріксіз қуанасың.

Мұқағали ақын жырлағандай, соғыстың қасыретін көзбен көрген, бейбіт өмірдің қадірін шын түсінген қарияларымыздың бірі келместің кемесіне мінсе, енді бірі «... күтіп, әнекей жағада тұр» ...

Сондықтан бейбіт өмірдің ризығын терген бүгінгі ұрпақтың абзал міндеті– ардагерлерге қамқорлық болып қала бермек.